2025.5.4家協主日

講道者：羅見福牧師

講道題目：予疼傳出去----主的內面人或是人客？(台語稿)

聖經經文：路加福音廿四13-35

聖　　詩：541

列位兄姐，逐家平安。今仔日是壽山中會家庭協談中心的奉獻主日，中會派我來咱教會，一方面是向咱逐家請安，另外一方面也是欲邀請兄弟姐妹做伙來關心家庭協談中心，予家庭協談中心通成做閣較多有問題的家庭的幫助。

幾年前佇網路有傳出來一支影片，是一个媽媽對房間出來，看著in的土腳有in飼的貓仔俥倒的飼料，拄佇彼時，伊的查某囝對遐經過，總是若親像無看見一樣。所以媽媽就真嚴肅對伊的查某囝教導，講「人客」佮「厝內面人」無仝的所在。後來媒體的電子報就將此支影片囥佇in的電子報裡面，當時有成十萬人看過此个影片。

影片予人有無仝款的感覺，有人認為機會教導真好；也有人認為按呢的做法無適當。總是我今仔日無欲對此支影片無仝款的感覺來思考，是欲用此个媽媽對囡仔問的「人客」或者是「厝內面人」的差別，佮咱來做一个反省。若是照影片中間彼个查某囡仔講，「人客」是來厝內食飯，然後sńg-sńg咧就轉去。就是厝內有代誌，佮人客是一點仔關係攏無，人客只是來thit-thô，厝內怎樣，伊根本無咧關心。若是「厝內面人」咧？會關心厝內的代誌，看著有需要做的時，就主動動手將伊做予好，毋是差kah人去做，佮伊一點仔關係攏無。

今仔日，咱欲對路加福音最後一章，佇以馬杵路上所發生的代誌，咱來思考咱是著做主厝內面的人，抑是做人客都好？

佇猶袂分享今仔日的信息以前，我有帶一个禮物欲送予咱逐家，這是上帝為我預備的伴手禮----福音咖啡，此份伴手禮並毋是欲送予你若定，也希望您提著了後，通將另外一盒仔提去送別人，所以我欲送咱在座每一个人兩盒仔咖啡，一盒仔分享予您啉，另外一盒仔請您分享去傳福音：一盒仔分享予你啉，另外一盒仔予你分享傳福音。

希望有人咧替我分送禮物的時，我來唱歌予咱聽。我有邀請幫我設計佮製作福音咖啡的楊育芬姐妹，她是台中杏林基督長老教會的姐妹，今仔日早起坐六點多的高鐵，專工來為我伴奏。我唱的第一首歌是台語歌，專門為著予疼傳出去此个主題所寫：「予疼傳出去」，希望會使邀請咱逐家做伙予基督的疼傳出去。

路加福音二十四章是咧講耶穌死復活了後的代誌。當有人佇七日的頭一日，也是過了安息日的早起時，in到耶穌的墓的所在，發現耶穌的墓門受拍開，耶穌已經無佇墓裡。

今仔日所看的經文，路加福音二十四章的13節講：「^13.像(siāng)彼日，學生中有二人去一个鄉社；名以馬忤，離耶路撒冷二十五里。」「像(siāng)彼日」所指的，也就是咧指耶穌復活的彼日，也就是七日的頭一日，就是現在的禮拜日，因為是主復活的日，所以咱攏稱做「主日」。

像彼日，經文並無講是早起或者是下埔，干焦講著有學生二个，往以馬杵的鄉社來行。此所在距離耶路撒冷城有二十五里。原文是講60个長度的單位，希臘一个長度的單位約略是190公尺左右，所以60斯他秋歐斯量其約差不多是11公里左右。差不多咱教會到鳳山衛武營的遠。

若是大人的腳步，對左營行到衛武營可能愛三點鐘，較慢咧，也差不多四點鐘，若是照28節29節，in將近以馬杵的時，日頭已經欲落山，大約是下埔五點左右，換一句來講，in差不多是透中晝行佇耶路撒冷往以馬杵的路上，去拄著耶穌。

耶路撒冷是聖殿的所在，是神聖的象徵；以馬杵原文的意思是溫泉，是會使予人放輕鬆的所在，耶穌的學生對聖殿往予人放輕鬆的溫泉鄉來行，有聖經學者指出，路加佇遮是咧指出耶穌死了後，學生的信仰是咧倒退，對屬靈的耶路撒冷城，向人人欣羡的溫泉地區來行。

14節到15節講：「^14.in相佮談論所經過攏總的事。^15.in咧談論相問的時，耶穌本身近倚，佮in相佮行；」in咧相佮談論所經過攏總的事，可能包括耶穌的過去，甚至是耶穌的出世，一直到耶穌受釘死，以及七日的頭一日所發生，耶穌的身軀無佇墓裡的代誌。有真多事予in想攏無，當咧想無的時，耶穌本身近倚，經文強調耶穌本身，並毋是講是in的幻影，是咧強調真正是耶穌親自倚近這兩个學生，閣佮in相佮行。16節：「^16.in二人迷目，致到袂認得伊。」in二人迷目，目睭矇霧，原文是有被動的形態，意思就是二人目睭的矇霧，是有其他的原因予in矇霧，才會致到in認袂出耶穌。拄才講是透中晝，豈有可能是日頭的光線予in目睭矇霧？或者是因為in的心已經面向著溫泉鄉的以馬杵的路，所以才會無注意著佮in做伙行路的人是耶穌。或者是in想講耶穌已經死，佇in身邊的此个人只不過是聲音佮耶穌相親像的另外一人若定。

17節^17.耶穌對in講：「恁行的時相佮辯論的是甚麼話？」in就徛咧，面帶憂容。當「徛咧，面帶憂容」意思是欲講，in予耶穌問的話影響，才會停落來，閣表現出心內憂傷的面容。表示耶穌的死，確實也予in真傷心。18節講：「^18.其中一个名革流巴應伊講：「你豈單身出外佇耶路撒冷，也毋知近日佇遐所經過的事嗎？」」其中一个學生的名叫做革流巴，歸本聖經只有此个所在提著革流巴此个名，閣講伊是耶穌的學生，拍算是欲講明，這兩个學生並毋是十二个使徒的其中兩个，是十二个使徒以外的兩个學生。革流巴對耶穌講：「你豈單身出外佇耶路撒冷，也毋知近日佇遐所經過的事嗎？」耶路撒冷---猶太宗教的中心此段時間所發生的代誌，豈講你攏毋知，您攏無咧關心，你拍算是出外人，毋是耶路撒冷此个大家庭的內面人，只是一个無咧關心耶路撒冷即呢大的代誌的人客而已。

若是干焦是人客，當然耶路撒冷此个大家庭厝內發生啥物代誌，佮人客無關係，做人客的人當然袂去關心，袂想欲去知影發生啥物款代誌。19節：「^19.伊共in講：「甚麼事啊？」」耶穌豈毋知影in咧想啥物？in咧談論的是啥物？當然知，耶穌是咧問予咱遮个毋知影的了解。19節後半段到24節，就是二个學生回答耶穌所問的問題。In咧講的是拿撒人耶穌的代誌，耶穌怎樣行大權能，無論講或者是行，攏有予人感覺著權能。

總是伊欲予人釘伊佇十字架頂來死，人本來是向望伊會使救贖以色列人脫離羅馬人的統治，但是，伊已經死啦，閣已經第三天啦！也有人講，天使講耶穌已經復活啦！總是阮去看，卻無看著拿撒勒人耶穌的身軀。

In有聽人講耶穌已經復活啦！但是這兩个學生豈有相信？即然in被稱做是耶穌的學生，那麼，耶穌曾三擺預言伊欲受害死，總是三日欲復活的事，in應該是愛有聽過，毋拘in豈有相信？in毋若無相信，閣心內憂悶。In干焦咧注目佇對in有利益的所在，就是有權能的耶穌會使做以色列的王，總是被刣死，此个向望已經拍破，所以心憂悶；現在，向望已經無啦，所以in的心就向放輕鬆溫泉鄉的路，離開耶路撒冷聖殿的方向來行。

25節到26節：「^25.耶穌對in講：「無知的人啊，先知所講一切的話，恁的心怎樣遐奧信啊！^26.基督受遮个艱苦，來入伊的榮光，豈毋應該嗎？」」老師講的話攏無咧聽，莫怪老師即呢受氣罵in是無知的人。

27節耶穌就閣將舊約先知所預言的話對in講，豈有效，當然也是無效，因為in的心猶閣是向以馬杵，向離開聖殿的方向，完全無心思閣來想上帝的話。28節in將近所欲去的鄉社，耶穌親像欲閣向較遠的所在去，29節，in二人就勉強耶穌佮in做伙住，因為日欲落啦！表示in的心雖然漸漸咧離開上帝，毋拘卻猶閣有憐憫人的心，簡單來講，就是猶閣有救，即然猶閣有救，猶袂到無法度挽回的時，耶穌攏無放棄。

所以，無論咱過去怎樣，只要咱猶閣有通悔改的時，咱著趁猶有機會通悔改趕緊悔改，毋通到佇受審判的日到，咱來後悔，已經是無路用啦！這兩个學生猶閣有憐憫的心，勉強家己佮耶穌做伙，所以耶穌就入去，佮in相佮住。為著欲救in的靈魂。

30節到31節講：「^30.相佮坐桌的時，耶穌提餅，祝謝，擘來予in。^31.in的目睭開，就認得伊。連鞭無閣看見。」相佮坐桌是咧表明食晚頓的時，也會使看做是咧守聖餐的時，因為耶穌的動作佮守聖餐的時是仝款的。這兩个學生無一定有參加耶穌設立聖餐彼暝的聖餐，總是隨耶穌的學生，拍算常常看過耶穌用此款的款式咧佮in做伙食飯，所以，耶穌此時的動作，就成做學生想起守聖餐的畫面。

保羅佇哥林多前書十一章有講，^23.….主耶穌予人賣彼暝有提餅，^24.祝謝來擘伊，講，此个是我的身軀，為著恁拍破的，恁著行按呢來記念我。^25.食了後也按呢捧杯，講，此个杯就是新約，佇我的血設立的，見若啉的時，著行按呢來記念我。^26.因為恁逐擺食此个餅，啉此个杯，是表明主的死，直到伊閣來。學生看著耶穌的動作，予in紀念著耶穌設立聖餐的話，in才記得耶穌，雄雄目睭開，是咧指心目開，看見in的向望，看見耶穌確實佇in的身邊，總是耶穌連鞭無閣看見。

32節講：「^32.in就相佮講：「路裡，伊佮咱講話，開拆聖經的時，咱的心豈無熱嗎？」」佇路裡in講啥物，兩个人攏有聽見，閣內心是火熱的，這就是欲表示in看見的並毋是幻影，並毋是日頭曝過頭所造成的，耶穌真正有復活。33節到35節：「^33.in就即時起身，倒去耶路撒冷，拄著十一个學生佮同佇咧的人聚集，^34.咧講：「主果然復活，也出現予西門看見。」^35.in二人也講起佇路裡所拄著的事，佮佇擘餅的時in怎樣認得伊。」有耶穌的向望，in就隨時越頭向耶路撒冷的方向，向上帝的方向去，彼所在有上帝的使徒佇咧，有做伙咧見證耶穌復活的真理，這兩个學生也將in所拄著的代誌，分享予其他的門徒聽。

教會就若親像此款的情景，佇咱的生活上，有機會拄著耶穌，感覺耶穌若親像是猶太人，是外國人的神，若親像耶穌是人客，咱才是主人，其實拄好是倒péng，主耶穌才是世界的主，伊才是主人，咱才是人客。如果咱若是干焦注目佇咱的身上的代誌，干焦看重家己利益的事，若按呢，咱雖然身軀佇基督的殿內，總是心卻是離咱的主愈離愈遠。

主耶穌的話，欲予咱反省，主耶穌的行做欲予咱看見，當咱心內時時有主所講佮所行咧紀念的時，咱欲對以馬杵的所在，越倒轉來面向上帝，閣佇上帝的殿內，欲有彼此分享，彼此激勵福音的事，通予咱愈堅固佇咱的信，咱的向望。

願咱佇主的殿內攏是一家人，毋是來ùn豆油，毋是來sńg-sńg咧就欲離開的心態。主耶穌費盡心思將咱對迷路的中間導倒轉，就是欲愛咱成做伊厝內面的人，予咱佮伊做伙佇厝內面得著福氣。

願咱會使時時用主的話做咱的提醒，提醒咱毋通過頭面向著屬世間的利益，著越轉身，面向上帝，向咱所插的標來跑走。閣佇主的殿內成做主的內面人，毋通干焦做人客。願聖神幫助。

最後，我閣來分享一首歌做結束，「掌管我生命的主」，這是一首當我靠著家己的氣力咧服事上帝，捉準上帝歡喜我按呢作，總是上帝予我拄著真大的艱苦，佇我拄著挫折的時，強強欲離開上帝，對員林騎腳踏車17公里到佇二水，閣對二水騎去溪洲，佇路途中經過田岸仔路，無月光也無路燈。

我開始埋怨上帝，為啥物導我到佇即呢烏暗的所在，祢也導我到佇一間已經上百年的老教會，我豈有能力牧養？當我咧埋怨上帝的時，有一个聲出現佇我的腦海內，彼个聲音講：「驕傲的人、愚憨的人，你的生命豈毋是我予你的嗎？若是有人欲害你，欲殺你，我若無允淮，有啥物人會使對我的手中提走你的生命。」所以我都那親像厝內面人仝款，伊無棄捒的厝內面人，逐時陣攏佇伊的看顧中，若無有上帝允准，無人會使害我、傷我，上帝是掌管我生命的主。

＊分享題目：

1.當我們有著憂傷、難過、病痛、死亡離別時，我們還記得主仍與我們

　同行嗎？

　2.當我們再一次將自己擺上給主，我們有勇氣將從主所領受、經歷的愛傳

　　出去嗎？